زوجي المخادع

                 

 

تقول صاحبه القصه : السلام عليكم انا الاسم ديالي سلمى اليوم جيت بغيت نعاود لكم القصه ديالي وكنتمنى تاخذوا منها عبره.., انا بنت واحد المدينه كبيره في المغرب تربيت وكبرت في واحد العائله لي الحمد لله من الطبقه المتوسطه قولوا فوق الطبقه المتوسطه كاع يعني عمرنا محتاجينا عمرني ما عرفت شي حاجه سميتها الجوع عمرني ما احتاجت شي حاجه ولا تخسيت منها يعني كبرت في الخير من الاخر ولكن ماشي اغنياء لهذيك الدرجه ديال البتخ... طفولي ديالي عشتها عاديه بحال جميع الاسر المغربيه الحمد لله العائله ديالي كاتكون من الام والاب ديالي ومن خوتي جوج اكبر مني. عائلتي الحمد لله متفاهمين ما فيهمش الخصومه بزاف منفتحيين اي واحد فينا كيقول الراي ديالو كانتقبلوه وكانوقفوا معه... ، فاش وصلت الباك هنا غادي نتعرف على واحد الولد اللي كان كايقرا معي في نفس القسم ونفس الشعبه للعلم انني انا ما عمري ما كانت عندي شي تجربه عاطفيه يعني هذا الشخص كان هو اول شخص غادي يلفت انتباه ديالي وغادي نحس من جهتو بشي حاجه... و واخا انا ماشي هي الشخص اللي بادر في البدايه وهو اللي كان كيحاول يتقرب مني بجميع الطرق حاولت انني انرفضو كيف ما كاندير ديما ولكن هذه المره قلبي كان عندو راي اخر... كان الاسم دياله كمال هو من عائله على قد الحال ماشي لا باس عليهم ولكن كان حتى هو تبارك الله كيقرا مزيان وكايحاول بجميع الطرق انه يجيب نقط مزيانه باش يحقق المستقبل اللي كيحلم بيه بحالي انا... من بعد ما تعرفت عليه مده شهرين هنا اعترف لي هو بالحب ديالو حتى انا اعترفت ليه واخا ما كنتش مقتنعه بهاد التصرف اللي درت حيت في عائلتي كبرنا على واحد المبدا ديال خاص كل شي يكون بالحلال وممنوع العلاقات المحرمه... واخا انا ما درت شي حاجه خايبه يعني غير واحد الاحساس من جهه واحد السيد ولكن كنت كانحس بواحد الذنب كبير....، المهم داز الباك نجحت انا وياه بنقطه مزيانه وهنا غادي نقاررو اننا بجوجنا غادي ندفعوا في نفس التخصص في الكليه واللي كانت عجبتنا وبطبيعه الحال دفعنا وقرينا فيها لمده خمس سنوات... كنا كانخرجوا بجوج كاندخلوا بجوج كانحفظوا بجوج كنت كانعطيه حتى من المدخول ديالي اللي كايعطيني الاب ديالي باش يقدر يعاون راسو باش يقدر يشري حوايج باش يقدر يشري الكتوبه اللي كايخصوه وكان واعدني باللي من بعد ما غادي نكملوا القرايه ديالنا ان شاء الله وغادي يخدم مده عام هذيك الساعه غادي يجي يخطبني انا في هاد المده كانوا كايجيوني الخطاب بزاف وكنت كانرفضهم كل مره وكاندير عذر باش ما يبقاوش العائله ديالي يقولوا لي تزوجي بزز....، وبالفعل من حسن الصدف انني خدمت انا وياه في نفس البلاصه في نفس العام اللي غادي نتزوجوا فيه الاب ديالي خدا لكل واحد في ولادو باطما وانا خذا لي حتى انا بارطما وفرشها لي على الذوق ديالي واخا لي حتى الطوموبيل...، الصراحه فرحت بزاف بهاد الخطوه اللي دار الاب ديالي حيت شاركت الاخبار مع كمال وقال لي ايوا ملي ولات عندنا الدار والطوموبيل ما كاين لاش اننا نتسناو عام من الاحسن اننا نتزوجوا دابا راه احنا صبرنا بما فيه الكفاية. وبالفعل جبدت الموضوع مع العائله ديالي واخا الاب ديالي ما كانش متقبله اما الام ديالي نهار شافته كحلات بالعمى قالت لي هذا ما دخلش لي القلبي نهائيا وكيبان لي فيه التحراميات...، عياو معيا باش نبدل الراي ديالي ولكن انا كنت كانبغيه بزاف وقلت لهم باللي انتم كاتشوفوه بحال هكا ولكن انا راه تعاشرت معه سنين وعمرني ما شفت منو شي حاجه اللي خايبه يعني الحكم ديالكم انتم غير ظاهري و صافي....، دارنا شافوا حتى عياو وقالوا لي ديري اللي بغيتي انت تعرفي وبالفعل كمال جاب العائله ديالو وخطبنا بعضياتنا وقررنا ان هذا الزواج من بعد شهر وتزوجنا ودرنا العرس وكان كل شيء بخير ولكن هنا غادي يخرج لنا واحد الشخص من الجنب واللي كانظن انكم توقعتوه هي الام ديالو...، من نهار اللي تزوجنا فيه وهي كاتدخل في اي حاجه كاتدخل في شي حوايج اللي ما يمكنش العقل ديالكم يستوعبهم وفاش كانقول له هضر معها كايقول لي ايوا هذيك الام ديالي انا ما نقدرش نقول لها شي كلمه تقلقها.... لدرجه انها ولات كاتعامل معي بحال الى انا اللي جالسه في الدار ديال ولدها وماشي داري انا وباللي الطوموبيل ديال ولدها ماشي ديالي انا وكاتنفخ عليا من لفوق.... تخيلوا الى طلعنا في الطوموبيل خاصني انا نرجع اللور الا جات للدار كاتبدا تهز وتحط وتقاد على قانة ديالها والا هضرت معها كاتبدا تبكي وتشكي وتندب وتجمع عليا في عباد الله و تقول باللي انا ما مزياناش معاها....، الصراحه دوزت تقريبا واحد العام ونص ديال الزواج على هذا الحال وماشي غير هذا الشيء وصافي حتى من السي كمال بداو كايخرجوا منو شي صيفات وشي اوجوه اللي ما عمرني ما عرفتهم في السنين اللي دازوا عرفتو تصدمت...، بقيت كاندسر فيه علي حتى ولا ينهزرني قدام اللي سوى واللي ما يسواش كنقول له كلمه كيقول لي 10 حتى حاجه ما بقات عاجباه في الدار حتى حاجه ما عاجباه فيا واللي قالتها له الام ديالو هي اللي خاصها تدار... زائد لقيتو شحال من مره خذا رشوه في الخدمه ديالنا ودوز واحد السلعه اللي ما كانش خاصها الدوز مرارا وتكرارا ومع ذلك كنت كانستر عليه وكانسكت وكانقول اي انسان كايغلط مع ان الاخطاء ديالو فاتوا الحدود...، بالنسبه لمصروف في الدار ماشي كنا كانصرفوا 50% 50% وانما تقريبا كنت كانصرف 90% وهو غير ذيك 10% مره مره...، هذا الشيء ما كنتش كانرد له البال او نقولوا باللي كنت عارفه باللي هذا الشيء اللي كايوقع ماشي طبيعي ولكن الحب ديالي له والتعلق ديالي فيه اللي كان كايخليني نغمض عيني على كل شيء وهو غير ما زايد فيه وزايد كيطلع...، سكت حتى عييت ومشيت عاودت الام ديالي كلشي وبقات كتعير فيا وقالت لي طلقي منو دابا انت كاعما مخصوصة وما محتاجاهش واي واحد يتمناك...، قلت ليها علاش ما نصبرش شوية يقدر يكون كايمر من شي ازمه ولا شي حاجه اللي خلاتو يتبدل بحال هكا... ، عيات معيا الام ديالي ولكن انا ما بدلتش الراي ديالي المهم دازت السته ديال السنين ولحد هاد اللحظه ما كانوش عندنا الاولاد وهذشي اللي خلى المشاكل اللي بيناتنا تزيد تكبر لواحد درجه خيالية...، كان في كل فرصه كيلقاها كيهني وكايقول لي باللي انا عقيم وما كانولدش قلت له علاش ما نمشيوش عند الطبيب ونشوفوا واش بصح انا اللي ما كانولدش ولا انت... قال لي يلاه قدامي غادي نمشيو عند صاحبي الطبيب من احسن الاطباء ونديروا عندو التحاليل ونشوفوا شكون اللي فيه المشكل....، وبالفعل درنا التحاليل ومن بعد ما خرجوا كان بصح انا اللي ما كانولدش وهنا فين غادي يطلع فوق راسي بمعنى الكلمه غادي نولي بحال شي جفاف تحت رجليه...، مشا يجري قال هذا الاخبار للناس كاملين اللي كايعرفهم حتى من الاوراق وراهم ليهم تخيلوا انه ما قدرش يستر مراتو ولا يخاف انها تجرح الى سمعات شي كلمة....، في هاد اللحظه بالضبط انا بديت كانحس بالتبلد المشاعر ديالي تخيلوا بحال الا جاء شي واحد وكب عليك الماء بااااااارد... قلت انا كنت كانفكر باللي الا كان هو اللي فيه المشكل غادي نسد هذا الموضوع وعمر شي حد ما غادي يعرف حتى نموت وما عمرني ما غادي نفكر انني نتشفى فيه ولا نفضحو ولكن هو ما راعاش المشاعر ديالي نهائيا ومن هاد اللحظه حطيت السطل ديالو بلا تقريب...، من هنا بديت كانرد معه البال ما بقاتش هذيك سلمى لاي حاجه كاتدوزها بالعكس ولا فين ما كايدخل الدار كانقلب لي حوايج وكانشوفوا الاوراق اللي دخلهم شنو حط شنو هز المهم بديت كناخذ الاحتياطات ديالي حيث عرفت راسي انني مع الشخص الخطا و بلي هاد بنادم اللي قدامي يقدر يدير اي حاجه بلا ما يضروا الضمير ديالو عليا....، الام ديالو من بعد ما عرفات هذا الاخبار ولات كل نهار كاتجي وكاتفتح معه الموضوع ديال الاولاد وباللي خاصو يكون الاب وخاصو يعاود يتزوج وباللي انا صافي شرفت واخا نحمل الا كتب الله كاع ما غاديش نقدر نكمل في لحمالة حيت انا صافي وصلت 30 عام وصحتي على قد الحال...، وخاصو يشوف حياتو وما يبقاش رابط راسو معي انا... قدامي كان كيقول لها الله يهديك.. الله ما بغاش يعطينا الاولاد ايوا صافي انا ما غاديش نتفارق انا وياها ولا نفكر نتزوج عليها ولكن واحد النهار غير بالصدفه كانت بدات معاه نفس الموضوع وهنا غادي يقول لها انا راه صافي لقيت البنت اللي غادي نتزوج بها وما غادي نقول لها والو حتى نتزوج باش ما تبرزطش لي مخي بالمشاكل...، قالت ليه مو الا عرفاتك تزوجتي عليها غادي توليو في المشاكل وغادي تحرمك من النعمه اللي كنتي عايش معها فيها ما كاتخلص حتى شي حاجه عايش فابور خاصك تبقى تلعب قدامها الزوج المحب الولهان الا بغيتي تبقى عايش بخير....، عرفتو في هاد اللحظه كنت كانحس باللي النار شاعله لي في قلبي ولكن واخا هكاك ما تصدمش بزاف حيث كتاشفت عليه اشياء اخرى كاتخلع و مزال ساكتة و اصلا وليت كانتوقع منو اي حاجه.... وهنا قلت له تعالى والله حتى نعودك في التربيه ونوريك هذا التحراميات اللي فيك انت فين الاخيره ديالها... ، في الليل جيت جلست حداه قلت له فلان انا راه سمعت الحوار كلو اللي دار ما بينك وما بين الام ديالك هنا بدا كايدخل وكايخرج في الهضره وكايعطي في المبررات... قلت له شوف انا ما عنديش نهائيا المشكل انك تزوج بالعكس انا بغيتك تعيش الحياه ديالك وما بغيتش نحرمك من شي حاجه السيد فاش سمع هاد الهضره فرح وما قداتو فرحه وقلت ليه عرفتي شنو انا غادي نتقبل الزوجه الثانيه ديالك بحال اختي وبغيت نحضر حتى انا العرس ونحضر لكلشي وتكون بيناتنا واحد العلاقه اللي زوينه... ، السيد غير سمع هاد الكلام وهو يقول لي ايوا ملي انت متقبله هادشي انا كنت خايف نجبد معاك واحد الموضوع شنو بان لك انا ما غاديش نبقى نصرف حتى شي حاجه في الدار هنا حيث غادي يوليو عندي جوج ديال العائلات وغادي يوليوا عندي بالزاف ديال المصاريف ما كرهتش كون عاونتيني حتى انت باش نكبر العائله الثانيه ديالي راه اولادي هما اولادك واحنا عائله واحده... قلت له اه ايوا ماشي مشكل صافي المصروف كامل ديال الدار هنا انا اللي غادي نتكلف به ما باقيش تحط حتى شي درهم وحتى بالنسبه للعائله الثانيه ديالك انا غادي نعاونك في المصروف ديالهم... ، السيد ولا كايشطح من الفرحه عنقني وباسلي فوق راسي وكان كيقول باللي صافي قولبتها ثاني كيف ما كاندير ديما....، المهم داز الوقت وانا مازال غاده معه في التمثيليه دياله مشخطه بالبنت وجلسنا وقال لهم بلا حشمه بلا حياء باللي انا ما كانولدش وباللي هو بغا يتزوج باش يكون عنده الاولاد وكان كايهضر بكل ثقه في النفس.... اما العائله ديال العروسه الجديده كانوا هازين المناخ ديالهم للسماء نقزت الام ديال العروسه بلا حشمه بلا حياء وقالت له ايوا ملي ما كاتولدش علاش ما طلقتيش انت وياها علاش غادي تبقى رابطها في عنقك وتمشي تاخذ بنتنا احنا وتوليوا في المشاكل....، بقيت كانشوف فيها وكانقول لها في خاطري غير صبري وغادي تشوفي شكون اللي غادي يتشفى في الاخر واش انا ولا انتما... خليتهم هادرين وانا كنت كناكل وكانشرب وكنشطح بحال اللي كينة في الخطوبة ديال خويا ولا اختي ماشي راجلي.. ، من بعد الخطوبه راجلي هز مراتو الثانيه ومشى هو وياها الفندق ووقع اللي وقع بيناتهم حيت بطبيعه الحال بيعها العجل كيف ما بيعوا لي انا وكان في هاد اللحظه مازال ما دارش معها العقد...، وجاء وعاود لي كلشي من الطقطق السلام عليكم الصراحه انا ما كنتش كانتوقع انه غايدير بحال هذا الخطوه اللي غادي تزيد تكمل الانتقام ديالي...، خصوصا ان البنت مازال قاصر يعني ما كملتش 18 عام... من بعد شهرين من وراء الخطوبه داروا العرس وكانوا قرروا انه من بعد ثلاثه اشهر فاش غادي تكمل السن القانوني غادي يديروا العقد يعني دايره العرس قبل العقد وهاد الكلاخ كلو حيت الزوج ديالي كان كاذب عليهم وقال لهم باللي كاع هذاك الشي اللي كانملكوه ديالو بحدو والعائله ديال العروسه كانوا طامعين بلي غادي يعطي بنتهم كلشي و يطلقني لهذا اعطوه بنتهم بلا ما يفكروا في العواقب لدرجه ان العروسة سبقات كلشي قبل العقد خسروا عليها دارهم غير 12 شاهد وفاتحه....، المهم نهار العرس لبست و تقاديت من دكشي وليت كنبان انا العروسة ملي شافوني بغاو يتفقسو كلشي كيتغامز عليا.... مامات العروسة بغات تشلل خليت حتى سخن طرح مزياان و حبست العرس بنادم ما فهم والو.... جيت قدام راجلي و هو حال فمو فيا و جلبدت وراق من صاك ضربتهم بيه لوجه حتى دار و قلت ليه ها الكادو ديال زواجك.... بدات عدوزتي تهز و تحط قلت ليه تزيدي كلمة اخرى ليوما نصيفطك مخلطة ما عرفة راسك من رجليك... قلت لها الا صبرت عليك هاد السنين كلها غير على قبل ولدك هذا خينا اللي ما كايسوى ما كايصلح ولكن دابا غادي تجمعي راسك احسن لك ولا ما غادي يعجبك حال... درت نشوف سي كمال اللي كان شاد الاوراق في يديه وما كايهضرش اللون ما بقاش له في وجهو قلت له هضر ياك انت اصلا ما كاتحدش قلت له قل لهم يلاه قل لهم باللي انت اللي ما كاتولدش او باللي اضحكتي عليا وكليتي لي رزقي وعذبتيني معنويا وجسديا ونفس هذشي غادي تعوديه على هذا البنت اللي ضحكتي عليها وخذيتي الشرف ديالها ودمرتي لها حياتها... الام ديال العروسه وباها واخواتاتها غير سمعوا هذا الكلام وجاو كيجري خداو الاوراق من يديه وبداو كيقراو فيهم عرفتو الحيحه اللي ناضت تقول باللي هادي جنازه ماشي عرس.... وهزيت الصاك ديالي وقلت له بارك الله لكما وبارك عليكما( بصوت ماهر زين هههههه) تهلا حتى توصلك الورقه ديال الطلاق ديالك حيت انا اللي غانطلقك ماشي نتا و زدت خرجت....، طريق كلها وهو كايصوني في التليفون وبلوكيتو من كلشي مشيت نيشان الدار جمعت الحوايج ديالو وخرجتهم قدام الباب وبدلت السوارت ديال الدار وديال اي حاجه كانت كتجمعنا بجوج... انتم تصدمتوا ياك ملي عرفتو باللي هو اللي ما كايولدش ماشي انا اوا ا سيادي في لوقيتة اللي كانت الام ديالو كاتحكر عليه انه يتزوج عليا حيت انا ما كانولدش واحد النهار انسى الكوفرفور محلول وانا جاني الفضول باش نعرف شنو اللي مخبيه تما وما كايبغي حتى شي واحد يعرفو لقيت شي فلوس مخبيهم تما ولقيت حتى شي اوراق كايتعلقوا بالسلعه اللي كايخرجها بلا اذن ولقيت حتى الورقه الاصليه ديال التحاليل اللي فيها باللي انا كانولد وما عندي حتى شي مشكل وهو اللي منو المشكل الصراحه كانت هذيك هي النقطه التي افاضت الكأس كيفما كانقولوا...، ومن تما انا بديت كانخطط انني ننتقم منو اما بالنسبه للزواج ديالو فهادي كانت غير فرصه ذهبيه جات حتى لعندي باش نكمل الخطه ديالي وحاليا انا محيتو من الحياه ديالي بالمره ومشيت درت له خلع وطلقت منو ورجعت كانعيش الحياه ديالي اول مره من بعد سنين كنحس باللي انا انسانة حرة...، ما تخيلوش هاد العلاقه سامه شحال خذات من الجهد ديالي وشحال اخذت من حياتي ومن الفرحه ديالي رجعت كانلبس مزيان كانخرج كانمشي لعند الكوافوره تهليت في راسي بواحد الطريقه اللي من شحال وانا كنتمنى نرجع لها تخيلوا انني وليت كانبان صغار ومن سن ديالي بزاف اللي كايشوفني كايسحاب لي عندي 20 ولا 22 سنه...، اما بالنسبه لهذاك الشخص اللي ما كايستحقش حتى ننطق الاسم ديالو ما خلى حتى شي طريقه باش يطلب السماحه مني ولكن انا سديت عليه جميع البيبان حتى ذكشي اللي كان كايديروا في الخدمه بلغت عليه والجراوا عليه من الخدمه وسديت هاذ الصفحه لهذا كنقول لكم اول درس تاخذوه في الحياه اه نبغيو الناس ماشي ما نبغيوش ولكن كاينه واحد الحاجه سميتها الوسطيه والاعتدال والخطاء كيبقى خطا واخا نحاولوا اننا نخبيوه ولا نقادوه باش ما نخسروش شي شخص واي شخص سام في الحياه ديالك تخلص منو في اقرب سله قمامه على حسابي دمتم سالمين.